政Whats噏:被批反增印花稅是走精面 張華峰斥盲目攻擊挑起矛盾

20210303
東網電視
更多新聞短片
張華峰話大家對股票印花稅嘅觀點可以不一,但要客觀同理性討論事件。
政府喺財政預算案中建議上調股票印花稅,引起金融業界不滿。但早前就有評論員話金融界反對調升股票印花稅係「獨肥不想拔一毛」,指金融服務業界議員張華峰(肥老闆)反對印花稅係「走精面」,肥老闆隨即就隔空反駁,喺社交平台撰文話大家觀點可以不一,但一定要客觀、理性議事喇。
肥老闆喺Facebook貼文話,有評論員矛頭直指佢「空言反對」加股票印花稅、「聰明的代議士」應提出可行替代方案。肥佬闆隨即唔忿氣兼反駁話,有人罔顧客觀事實,對香港金融界同佢作出無理指摘及攻擊,實在「是可忍,孰不可忍」。佢解釋話早喺財政預算諮詢階段,已經聯同金融服務界人士多次向政府力呈反對調加印花稅嘅理據,仲強調政府要增加收入嘅話,就應該做大金融市場呢個餅,咁先至係增加收入嘅正道。
對於盲目批評,肥老闆話公道自在人心,認為大家觀點可以不一,但強調作為評論員應該客觀、理性議事同埋尊重事實。佢仲話盲目攻擊他人會挑起矛盾、製造是非,最終只會自毀聲譽咋!