政Whats噏：泛民捉錯字質疑建制自行掛橫額　被指糾纏於瑣事

泛民區議員發現「敗陣」建制派前區議員，喺區內懸掛嘅橫額有錯字，質疑對方根本無申請懸掛橫額。有關人士隨即反駁，話已經做足程序，希望區議員可以集中民生抗疫工作，唔好將芝麻綠豆嘅小事放大嚟睇喇。

東區區議員何偉倫，喺社交網站分享當區前區議員王志鍾懸掛嘅橫額，話印上嘅核准編號同以往唔同，而且「核准」二字竟然變成「核淮」，質疑對方係非法懸掛橫額。何又話，以往地政總署唔會批准立法會議員或者區議員以外人士申請展示橫額，作個人宣傳。唔知點解中西區區議員葉錦龍都踩過界抽水，笑王志鍾「中文字都唔識」，唔識個「淮」字，問佢係咪喺度賣淮山喎？

王志鍾回應東網查詢，強調有跟足程序向地政總署作出申請，亦獲得批准懸掛橫額。又話橫額上嘅錯字只係源於手民之誤，會改番做正字。王仲話只係想透過橫額提醒居民注意疫下健康，而當區區議員理應視防疫抗疫工作為首要任務，唔應該喺呢啲芝麻綠豆嘅事上糾纏囉。東網亦向地政總署查詢核實事件，暫時未有回覆。