政Whats噏：消息指已離港赴台　鄭家朗：暫不回應

有傳前香港眾志副主席鄭家朗離開香港，並已經前往台灣。外界都估計佢是否步其他泛民主派人士嘅後塵、棄保潛逃。鄭家朗卒之現身，表示暫時唔會回應任何提問喎。

消息喺尋日(9日)傳出，但未知鄭家朗只係暫時離港，抑或係長時間離開。鄭家朗終於回覆傳媒查詢，話暫時唔會回應任何提問。其實鄭家朗目前有案件纏身，海關喺舊年5月曾經指眾志出售嘅口罩，涉嫌違反《商品說明條例》而拘捕鄭，佢之後獲准保釋候查。

外界都議論紛紛，猜測鄭家朗係棄保潛逃。皆因佢早有「前科」，前議員羅冠聰喺舊年離港，同行人士包括鄭家朗。鄭之後承認事件，但話牽涉到家庭同埋私人事務，唔方便透露詳情，不過就否認係潛逃。事實上，現時至少已經有19名曾經提倡香港獨立或者民主自決嘅政治人物流亡海外，包括前議員許智峯、前「香港獨立聯盟」召集人陳家駒等。