政Whats噏:多個團體相繼割席 新民主同盟退民陣避風頭

20210313
東網電視
更多新聞短片
民陣過去曾舉辦多次反政府遊行示威。
繼街坊工友服務處(街工)同公民黨宣布唔再參與民陣事務,再有成員團體包括新民主同盟等決定退出民陣。民陣承認目前已經有6至7個團體表明退出,但仍然會保持運作喎。
新民主同盟尋日(12日)發聲明,話基於現時政治氣氛同形勢,未來唔會再參與民陣嘅工作同會議。但原來新民主同盟本身都一嘗被割席嘅滋味,西貢區議員黎煒棠喺同日申請退黨,感謝喺過往一段時間同行嘅大家喎。另外,民主中國陣線同天主教正義和平委員會,同樣退出民陣工作。天主教正義和平委員會幹事孔令瑜更曾兩度出任民陣召集人,佢回應傳媒查詢時話,已經向民陣交代退出原因,唔會再作公開說明。
有關退民陣浪潮似乎陸續有嚟,據悉民主黨喺下周一召開嘅中委會,將會深入討論是否退出民陣。民陣召集人陳皓桓坦言,目前有6至7個團體表明退出,會尊重同理解佢哋嘅決定,而民陣仍然會繼續運作。
香港中小型律師行協會創會會長陳曼琪直言,民陣屬於非註冊組織,政府唔可以因為組織長期存在,就唔處理、不作為,似乎視而不見。對於有成員接二連三咁退出民陣,陳曼琪認為成員本身就知道民陣有問題,先會紛紛「跳船」。
新加坡媒體早前引述消息,指港府正調查民陣有否違反《港區國安法》,包括有無接受美國國家民主基金會(NED)資助,若屬實或會喺短時間內取締民陣。陳皓桓當時指,無收取任何外國政府或機構嘅資助,又強調民陣唔會解散。