政Whats噏：涉違國安法被還押　劉頴匡貼信封慢囚友一半

47名發起或參與去年民主派「35+」初選人士，涉嫌違反《港區國安法》，被控串謀顛覆國家政權罪，其中一名被告前民間集會團隊發言人劉頴匡仍然被還押。其女友今日（18日）探過佢，仲話劉申請咗工作，係將一張紙貼成信封，但竟然處理得麻麻喎！

劉嘅女朋友話，雖然劉係會考拔尖入中大，但對於貼信封呢份工作就處理得麻麻，比起年紀大一倍嘅囚友仲要慢一半有多。女朋友講笑話希望劉努力啲啦，事關貼夠100個信封就會有7蚊嘅工資，叫劉賺錢幫補下自己啲坐監開支咁話喎，又話劉一個月只要貼到10萬個信封，就夠畀佢自己嘅私飯錢喇！

女朋友仲話劉嘅頭髮厚到成個蓋咁，但見佢嗰陣都有盡量保持精神嘅。劉又向女友透露還押嘅生活都係千篇一律，尤其佢係單獨囚禁，所以寫畀女朋友嘅信中，大概都係自己嘅腦內交戰，女朋友仲笑說希望劉唔好戰戰下精神分裂埋啦！