政Whats噏:政府企硬加股票印花稅 張華峰讓步倡設日落條款

20210320
東網電視
更多新聞短片
張華峰屢批增加股票印花稅是殺雞取卵,建議設日落條款。
政府於《財政預算案》中宣布將股票交易印花稅由0.1%增至0.13%。金融服務界議員張華峰(肥老闆)激到扎扎跳,狠批政府殺雞取卵,屢勸政府收回成命。之不過政府似乎無動於衷,肥老闆惟有「讓步」,建議政府可以採取單邊收費,以及設立日落條款。
肥老闆一直狠批政府加稅係殺雞取卵,佢日前接受傳媒訪問時話,政府想透過加稅為庫房每年帶嚟120億港元收入,但其實賣一、兩幅地皮都已經賺到啲錢喇,又使乜咁大陣仗加稅呢。而環顧主要嘅股票交易所,例如美國、新加坡已經豁免徵收股票印花稅,資訊發達嘅情況下,令佢哋好容易「搶客」。
不過,政府表明無後備方案,仲預料喺今年8月1日生效添。見到根本無彎轉,肥老闆建議政府效法內地,只係單邊增加稅項,唔需要向買賣雙方同時加稅。而且,政府預計下半年經濟有望復甦,肥老闆就話實施印花稅時已經係下半年,唔明白點解要急急腳推出措施。佢亦建議喺經濟復甦後,政府可以將稅率「還原基本步」啊。