政Whats噏：盧偉國開群組教人炒股　仲叫人高價接貨？

本港股市近期大上大落，投資者都希望有「獨家消息」，掌握投資秘技。通訊軟件不時出現股票投資群組，近日仲發現經民聯主席、議員盧偉國(WK)都開群組教人炒股喎！

原來係有位自稱「黃Sir」嘅人士，利用WK張相開群組，仲喺群組內推介仙股，叫人高價接貨。WK話自己根本唔識炒股，當然唔會開呢類群組喇。WK表示，自己喺參選時有使用該張相片，相信喺網絡平台好容易搵到張相，就被不法之徒盜用喇。

坊間屢有騙徒利用「太空卡」犯案，政府建議推行電話卡實名登記制度，希望減少同類騙案。WK提到網絡世界固然方便，但同時存有各種陷阱，支持堵塞利用匿名太空卡行騙嘅漏洞。至於需要大量電話卡作正當商業用途嘅特殊情況，就希望政府可以提供豁免喇。