政Whats噏：失業惡化避而不談　羅致光網誌講環保轉移視線？

最新嘅失業率達7.2%，續創近17年高位，失業大軍已逾26萬人。面對愈嚟愈嚴重嘅失業問題，勞工及福利局局長羅致光喺今日(21日)發表嘅網誌竟避而不談，仲似乎搵嘢講到「撈過界」，呼籲合資格社福機構參加「綠色社福機構」計劃，為環保節能同減碳出一分力喎，唔講真係以為睇緊環境局嘅局長網誌呀！

羅致光喺網誌話新一份財政預算案預留咗1.5億元推行「綠色社福機構」計劃，資助合資格社福機構安裝節能裝置，又話機電署前年3月起已推行「採電學社」計劃，獲社署津助嘅非政府福利機構可申請免費安裝太陽能發電系統，並鼓勵更多社福機構善用呢兩個計劃令香港實現碳中和。

失業問題隻字不提，竟然係講環保。究竟佢知唔知乜嘢叫急市民所急？唔怪得呢排咁多議員狂轟班問責官員薪高糧準，但就唔知民間疾苦，政策離地喇！

失業問題愈趨嚴重係不爭嘅事實，事關政府唔肯再推保就業計劃，對於坊間同各大黨派都有呼聲話要求政府設立短期失業援助金，以紓緩失業人士嘅經濟壓力，而喺早幾日嘅立法會大會上都有就相關主題嘅議員議案討論。之不過，當局嘅態度都係企硬唔做，當時已經畀議員鬧爆羅致光「為官避事平生恥」，仲講到唔想做或者冇能力做就走人，擺明係叫羅下台。

羅以往嘅網誌大部分同當局嘅範疇有關，而自疫情以嚟，羅約有12篇同失業問題相關嘅網誌，至於今年就有2篇網誌同失業相關，但講嚟講去都係話「香港做唔到失業金制度」。可能覺得解決失業問題喺「燙手山芋」，又或者覺得呢排畀班議員鬧得太甘，出名高智商嘅羅都想避吓風頭，轉話題講環保，而環境局局長黃錦星都有幫佢唱雙簧，喺自己社交媒體轉載網誌，但就用咗「勞福局羅局長講杜鵑木棉雞蛋花？」為題。唔通佢都好奇怪羅竟然突然間扯上環保，覺得羅想擺佢上枱轉移視線？

所謂「各司其職、各負其責」，做事亦要分緩急輕重，所以環保議題真係唔使羅操心，相反點扶助26萬失業大軍脫苦海先係佢首當其衝嘅工作重點，依家竟然連提都唔提。失業人數愈嚟愈多，市民喺度捱緊苦，政府咪以為唔講就唔存在，咁根本係自欺欺人，不顧市民死活，唔怪得深層次矛盾解決唔到，民怨沖天喇！