政Whats噏:滯英畢東尼終返港讚助理稱職 街坊暗寸讚自己

2021年03月22日 13:59
東網電視
更多新聞短片
畢東尼(左)滯英3個月終返港。
舊年12月適逢九龍灣麗晶花園爆疫期間,但當區區議員畢東尼就竟然身處英國探親,當時就畀網民鬧爆拋低當區居民,不如索性移民喇。事隔3個月,佢終於返咗香港喇!今日(22日)仲不忙快快喺辦事處打卡擺上社交媒體專頁,同全世界講佢返咗嚟添。之但係,雖然佢喺貼文感謝助理幫佢打理到辦事處井井有條,但就有疑似街坊嘅網民唔受落,仲留言寸話「要住客讚賞,不是自己讚自己」。
畢東尼喺貼文中話,感恩經過合共42日嘅隔離及44日內6次嘅咽喉拭子病毒檢測,今日佢終於可以順利回家,回到麗晶work from 「HOME」。佢又話必需感謝陳生同莊小姐2位助理,喺短短3個月處理好當區嘅大小事務,包括滲水、社署轉介個案、地區事務等。另外仲會繼續關注滯英港人議題,包括會再去信特首同行會要求解封咁話。
雖則佢好滿意助理嘅工作表現,似乎當區街坊就唔係咁睇喎。有疑似居民喺貼文下留言話「請處理有街坊對你助理陳先生的投訴」、「始終不敢回應陳生失職事。如何改善服務」、「要住客讚賞,不是自己讚自己」等,擺明係寸畢東尼唔稱職,唔滿意呢個區議員辦事處嘅服務。