政Whats噏：吳敏兒獄中舊患復發狂食藥　未可離開囚室活動

職工盟前主席吳敏兒(Carol)因有份參與上年民主派「35+」初選，而被控違反《港區國安法》，依家正被還押。職工盟今日夜晚(23日)喺Facebook上傳其親筆信，Carol話因為舊患復發，腰和頸部都好痛，搞到每日都要食止痛藥喎。佢仲話自己與同樣正被還押嘅醫院管理局員工陣線主席余慧明及南區區議員袁嘉蔚等人，因為仲要隔離21日，所以暫時未有機會出去囚室外活動。

Carol喺信中交代獄中生活，話獄警非想像中咁惡，又指有懲教員留意到佢食咁多止痛藥，就話會喺星期一安排佢去睇見獄中嘅醫生。佢話每日早上6點半就要起身、摺被、換衫、清潔房間，而因為佢係單獨囚禁，所以自己地方都要自己打掃啊。

至於獄中嘅伙食點呢？Carol就形容好似營養餐咁，仲話以前都有唔少人笑佢應該要去減肥，所以佢希望有規律啲嘅生活同休息，唔單止減肥，亦令自己健康啲喎，更透露自己已經輕咗5磅添啊。其實獄中生活就係咁㗎啦，早知今日又何必當初呢？