政Whats噏：香港捲入新疆棉風波　鍾國斌：期望爭議盡快平息

多間國際知名服裝品牌日前宣布拒絕採購或使用新疆棉花，惹來內地民眾抵制。作為國際都會嘅香港亦都避唔過到呢場風波，繼藝人表態後，多位建制派議員都有唔同嘅意見，有人話唔會改變消費習慣，有人宣布停用相關品牌嘅產品，亦有人支持國產貨咁話。

紡織及製衣界議員鍾國斌(Felix)今日(26日)朝早出席一個電台節目，期間佢猛呻依家生意真係好難做，只係搵兩餐飯食啫，竟突然捲入國際鬥爭漩渦，真係好慘。Felix話，由做生意嘅角度去睇，只係希望爭議盡快平息，被問到會唔會對涉事嘅國際品牌作出抗議，佢就話梗係唔會咁做啦。

Felix話，新疆棉花嘅品質向來上乘，由於事件已經演變成國際商貿糾紛，估計本港部分廠商鑑於產品要出口到歐美，或者會暫時轉用巴基斯坦或印度棉花，當大批廠商同時轉用外國棉花，有可能令同類貨品價格上升，最終成本會轉嫁至外國品牌。由於唔少國際知名品牌喺過去10年，其業績增長主要依賴中國市場。受疫情影響下，內地經濟持續表現較好，認為上述國際品牌要自行衡量，係咪要放棄中國嘅大生意。Felix又形容，禁止成員使用新疆棉花嘅非營利組織「良好棉花發展協會」，只係一個非常小型嘅團體，唔知佢哋有無到訪過新疆實地視察，確定有強迫勞動等情況。

本身做開服裝生意嘅議員田北辰，就指新疆棉花係中上價嘅優質棉花，依家8成新疆棉花都係透過機器採收，2成就用人手，每年8至10月係收割期，要由外省聘請人手前往新疆工作，當地公司要付出較平日高出6成嘅薪金，認為並唔係招聘廉價勞工。

議員謝偉俊係日本某時裝品牌嘅「捧場客」，佢話今次爭議事件唔會改變佢嘅消費習慣。不過議員葉劉淑儀就唱反調喇，決定停買同停用英國某高檔品牌，直到呢間公司願意道歉為止喎。勞工界議員陸頌雄上載兩對國產運動波鞋嘅相片到社交平台，話除咗某兩隻外國品牌之外，仲有好多平靚正選擇啊。睇嚟呢場風波都要一段時間先可以平息喇，學Felix話齋，都係搵兩餐飯食啫，無謂搞到啲公司生意難做吖。