政Whats噏：獅如其名？　匿獅Lion今年首季fb僅發4貼文

唔怕生壞命，最怕改壞名？衞生署喺2018年推出吉祥物「匿獅Lion」（英文名係「Lazy」），希望推動都市人就算日常幾攰，都要抽時間做體能活動。之不過，匿獅Lion最近就變到同佢個名一樣咁Lazy（懶惰），事關踏入2021年已經差唔多3個月，佢喺Facebook（fb）專頁加埋只係出得4個Post（貼文）！

翻查匿獅Lion嘅fb專頁，佢喺2020年全年合共出咗約140個Post；其中喺舊年頭11個月，每個月都會發至少10則貼文，但12月就跌到得返6則。到咗今年，佢就好似變得更加懶，每隔約20日先出1個Post；其中喺1月只係發咗2則貼文，而2月同截至目前為止嘅3月就更誇張，各只得1則。

到底點解匿獅Lion最近唔單止Lazy咗，仲好似「匿埋咗」？衞生署回應時重申，該專頁係其中一個宣傳健康生活模式嘅渠道，又話會定期審視相關推廣工作同調整。但無論如何，政府吉祥物嘅開支係由公帑承擔，點都唔應該繼續Lazy落去！