政Whats噏:上海仔偷偷摸摸充闊佬 包房食飯走後門閃人

20210330
東網電視
更多新聞短片
兩度棄保潛逃嘅本港黑幫和勝和前坐館「上海仔」郭永鴻,雖日暮途窮,但仍然「窮風流」,五日內多次外出閒逛及用膳,非常高調。繼上周四(25日)東網發現上海仔到銅鑼灣一珠寶店購物及去中菜館用膳後,今晚再被發現佢到灣仔用膳「充闊佬」,食完仲要從餐廳後門離開,鬼鬼祟祟。
晚上大約8點,東網記者發現上海仔喺灣仔一帶出現,並到駱克道54-62號博匯大廈一間中菜餐廳包房用膳,期間4名身穿西裝、佩戴口罩嘅保鏢護送,食一餐飯,要動員咁多保鏢,可能知道自己虧心事做得多、非常怕死啦。
大約一個小時後,上海仔食飽離開,但點知唔係由正門離開,竟然係後門離開,食飽走後門,實有內情啦!期間保鏢前後護送,保鏢仲手拎多幾袋物品,唔知係咩嚟?
出門口離開時,上海仔竟然仲「扮大方、充闊佬」畀貼士一個懷疑係大廈保安嘅男子,畀完之後就登上黑色私家車,揚長而去。
四處流竄嘅上海仔於去年11月22日晚上返港,喺機場被捕,其後獲准以20萬港元現金保釋外出,佢需要喺今年5月6日再去警署報到。翻查紀錄,上海仔曾涉及兩宗棄保潛逃案,首宗喺2016年7月,佢乘搭飛機由泰國返港,於機場被「O記」拘捕,涉嫌刑事誹謗、串謀傷人以及串謀刑事毀壞,其後獲准以5萬港元保釋,要喺2018年5月就事件去警署續擔保,但當日並冇現身,被警方發出通緝令以及充公保證金。
另一宗棄保案則係涉嫌於2007年1月至2012年7月,清洗過億港元懷疑黑錢,及後獲准以20萬港元保釋候查。佢需要於2018年4月去警署報到,但竟然聲稱喺泰國中風而冇現身,及後就被影到身處柬埔寨一間賭場,行得企得,視警方如無物。
另外,曾四度被捕嘅上海仔亦正被澳門通緝。2015年12月,上海仔與同夥退休高級警司王福林喺澳門盜竊以及訛騙,偷取賭廳籌碼同現金總共6,000萬港元,被澳門當局正式立案,兩人一旦入境澳門就會即刻被扣查,通緝令依家仲有效。