政Whats噏:鍾翰林關押5個月 囚友關注梁頌恆游蕙禎有路

20210402
東網電視
更多新聞短片
囚友關注游蕙禎(左)同梁頌恆(右)係咪有路。
前學生動源召集人鍾翰林被警方國家安全處控告分裂國家罪、串謀發布煽動性刊物罪以及洗黑錢罪,身陷囹圄約5個月,終於首度發公開信交代現況,指自己決心投身社運前,已經有坐監嘅心理準備。又話遇到部分囚友嘅問題好有趣,會關注青年新政前立法會議員游蕙禎同梁頌恆係咪有路喎。
鍾翰林早前被控侮辱國旗及非法集結罪,其後再被加控違反《港區國安法》而一直在囚。佢嘅社交專頁今日(2日)上載佢嘅第一封獄中信件,話以往一直有接觸在囚人士,對於入獄冇太大嘅恐懼及唔適應,飯餸甚至比起中學嘅伙食還要好。不過,最難適應嘅係群體生活,因為自己鍾意獨處,仲努力適應緊同一班同齡、甚或比自己年輕嘅囚友相處。不過鍾同囚友之間都有趣事喎,囚友知道佢係社運人士後,會問前香港眾志成員周庭係咪好靚,仲問游蕙禎同梁頌恆係咪有路添。
其實外界一直揣測兩人有路,事關游梁兩人以前成日出雙入對。當佢哋雙雙當選為立法會議員後,喺宣誓時展示寫有「Hong Kong Is Not China(香港不是中國)」嘅旗幟。最終被裁定宣誓無效而喪失議員資格,更被立法會入稟追討已發放嘅酬金、利息及訟費。梁、游二人官司纏身,喺喪失議員資格後,強行進入會議室造成混亂,同被判參與非法集結罪成,要服刑4星期。之不過,現時就得返游蕙禎隻身一人,事關梁已經去咗美國尋求政治庇護喇!