政Whats噏：議員行山巧遇鄧炳強　形容一哥雄赳赳乃香港安全保證

適逢復活節長假期，市民紛紛遊山玩水。但係身為警務處處長嘅鄧炳強仍要時刻緊守崗位，被議員巧遇佢率領同袍喺山頂散步，大讚警隊精神抖擻，狀態非常好，簡直係香港安全嘅信心保證啊！

議員葉劉淑儀今日(2日)發布網上貼文，話說佢今朝去山頂警隊博物館附近行山，竟然有幸巧遇一哥喎！葉劉形容當時突然傳嚟一陣風笛聲，之後見到一群雄赳赳嘅男子漢迎面而至。為首一人仲要非常之熟口面，正正就係警隊一哥，當然要把握機會影張合照喇。眼見兩人身穿運動裝，非常貼地親民啊。

事關今朝警隊博物館有活動，特別安排警隊樂隊表演，一哥更加親身客串星級導賞員，陪同市民參觀以及講解館內展品。適逢天朗氣清，一哥出席活動後就並冇停低，隨即率領一眾同袍巡視附近區域。葉劉形容眾人精神抖擻、狀態非常好。令佢深深感受到精良優秀嘅香港警隊，正正係城市安全嘅保證啊！