政Whats噏：「熱廚房」雙囍臨門　兩政助疫情下低調結婚

雖然疫情陰霾仍然籠罩本港，但亦無阻紅鸞星動，踏入2021年只係短短3個月，政圈已經喜事連連，先後有2位區議員同1位立法會前議員結婚。至於喺「熱廚房」嘅問責團隊亦都唔執輸，事關財經事務及庫務局政治助理葉俊廉(Julian)，同創新及科技局政治助理張曼莉(Lillian)，早前亦各自同另一半低調結婚！

Lillian話，自己同夫婿嘅愛情長跑長達10年，早前已決定拉埋天窗，一齊踏入人生新嘅階段。之不過，佢就透露其上司、創科局局長薛永恒並無出席佢嘅證婚儀式，事關喺疫情下有人數限制，只能夠小規模咁樣搞，所以都無搞到婚禮，即使創科局一班同事知道佢要結婚，都無法親身到場分享喜悅。

同樣受疫情影響結婚部署嘅，仲有喺上年5月底先加入政府問責班子嘅Julian。佢回應我哋查詢時，就話疫情下婚禮安排一切從簡，又透露佢同太太本身亦計劃擺酒，但最終亦無奈要取消喇！