政Whats噏：傳藝人馬浚偉接管港台電視部　佢點講？

年耗逾10億元公帑嘅香港電台(港台)近年運作立立亂，多次被批評所製作嘅節目立場偏頗，新任廣播處處長李百全喺上月履新後更接連抽起部分節目集數引起外界關注。唔知港台高層係咪發現電視部製作上屢次出現問題，近日有傳藝人馬浚偉將接管港台電視部，仲話嚟緊可能會拍啲社福節目喎！

東網今(5日)向馬浚偉查詢時，佢就矢口否認有關消息，仲話「真係越傳越誇張喎，我真係笑到無氣啦！」雖然佢咁講啫，但所謂「空穴來風，未必無因」嘛！雖然佢過去較多以歌手同演員身份出現喺大眾眼前，但近年佢亦涉足教育事業，分別開咗補習社同藝術教育中心。更有指佢同政府官員熟稔，佢曾獲邀請加入有關演藝文化、教育之類嘅委員會，只係佢最後無答應。

就咁睇嚟，馬浚偉同政府關係匪淺，難怪傳佢係人選啦！之不過，港台問題多多，好難一時三刻解決得到，如果最終係佢接手呢個燙手山芋，唔知佢招唔招架得住呢？