政Whats噏：獄中撰寫家書　林卓廷坦承愧對妻子

47名發起或參與去年民主派「35+」初選人士，涉嫌違反《港區國安法》，被控串謀顛覆國家政權罪。涉案人之一嘅林卓廷放棄8天保釋覆核權利，目前正被還押。林嘅兒子阿智今日(6日)透過社交平台直播，讀出林在囚後首封家書。林喺家書中表示，經常要妻子擔心，身為丈夫實在愧疚。

林嘅首封鐵窗家書係於3月10日撰寫，佢提到識於微時嘅妻子，雖相依相伴30年，但安穩日子得幾年，反而成日要妻子擔心、惶恐，身為丈夫實在愧疚。林又話早前被檢控，期間唔可以電聯，加上家人不准庭上旁聽，早前見返老婆已經感覺恍如隔世。

對於獄中生活，林話一開始唔認識囚友，加上冇報紙、書同埋紙筆，一開始淨係可以喺囚室內運動。之不過，佢認為獄中日子超過一年都不足為奇，所以要盡快適應、積極面對。佢又話唔習慣嘅係飯餸「少肉多飯」，有時難免想食私飯。唔知佢係咪太高？佢仲投訴毛氈太短，冚得頭就冚唔到腳喇！