政Whats噏：涉違國安法被還押　岑子杰自認比黨友更適合坐監

警方國安處喺今年1月拘捕55名有份組織或參與民主派「35+」初選人士，指該等人士涉嫌違反《港區國安法》，當中包括社民連沙田區議員岑子杰同立法會前議員「長毛」梁國雄。立法會前議員邵家臻今午（7日）喺Facebook發貼文，引述社民連秘書長吳文遠探望正被還押嘅黨友岑子杰，透露岑認為自己比其他黨友更適合坐監。

邵家臻今日喺貼文引述吳文遠探望岑子杰嘅情況，指岑精神唔錯，又引述佢「甚至認為自己比其他社民連同夥更適合坐監」！邵喺貼文中話，「不同的社民連核心人物都有案件在身」，形容佢哋「隨時要放一放暑假」，暗示佢哋可能隨時會被還押或者坐監。

貼文又提到，岑依家每日做運動時，都會同兩、三個喺同一走廊嘅囚友一齊踢踺丶傾偈，順便處理一下過去彼此間對唔同議題嘅分歧；亦都會睇吓書同寫吓信咁。