政Whats噏：開會唔專心　陳帆睇南韓市長選舉　許正宇除罩抹鼻涕

立法會今日(8日)早上舉行特首答問會，為時1個半鐘，會上唔少議員都關注政府表現，促政府要大力改善！之但係，在場嘅官員唔知係咪開始覺得無聊，唔單止停晒手唔抄筆記之餘，仲開始做自己嘢。就好似運輸及房屋局局長陳帆，就用席上嘅電腦上網睇南韓市長選舉新聞。

其實會上議員都提到好多關於本地民生大小事，但陳帆喺會議開咗1個鐘左右，就開始分心上網睇新聞，包括南韓首爾市長補選最新情況。而財經事務及庫務局許正宇就唔知係咪病咗，成個會上不停除口罩抹鼻涕，感覺唔多衞生喎。

至於議員方面，過去經常有人開會時唔專心，喺通訊軟件落單購物，通通畀人影低。依家大家都吸取教訓，即使撳電話都遮遮掩掩，亦長時間保持警惕望下2樓公眾席情況。其中議員鄭泳舜手機即使加上防偷窺貼，但係警覺性都好強，不時聽到2樓有快門聲時，都會望一望上去。