政Whats噏：新婚張曼莉話生B遲啲先　馮興禮唔抗拒生多個

話說身在「熱廚房」嘅創新及科技局政治助理張曼莉(Lillian)，早前就同男朋友拉埋天窗！喺工作咁忙碌嘅情況下，唔知Lilian踏入新嘅人生階段後，會唔會想學勞工及福利局政治助理馮興禮(Henry)一樣，未來生返個B呢？

立法會今朝（8日）舉行特首答問會，一眾政治助理齊集，當中包括Lilian，都係最近結婚嘅財經事務及庫務局局長政治助理葉俊廉。剛結束咗長達10年愛情長跑嘅Lillian被問到會唔會計劃為屋企增添新成員時，佢就話依家都係專心工作先，遲啲有好消息再通知大家喎！

至於喺一旁嘅Henry前年同太太一索得男，佢透露有長輩都有聲音希望佢哋生多個B，佢就話自己同太太都唔抗拒，仲話如要生多個的話，都會係呢一兩年嘅事，因為唔想細仔同大仔年齡相差太遠啊。就咁睇嚟，應該好快可以聽到Henry好消息喇！