政Whats噏:影片點擊率太低 議員過招教康文署點做KOL

2021年04月08日 17:57
東網電視
更多新聞短片
何君堯向康文署教路,建議善用港台及政府新聞處嘅資源,減少成本開支。
依家唔少建制派議員都身兼KOL(關鍵意見領袖),拍片上傳到社交媒體以發表自己對各項社會議題嘅睇法。康樂及文化事務署上年12月推出一站式網上文康資訊學習平台「寓樂頻道」,部分影片雖然上載到網上,但係點擊率就唔多理想,一班議員都忍唔住要教署方點樣做KOL啊。
立法會民政事務委員會今日(8日)開會討論有關頻道,根據署方資料,截止今年2月底「寓樂頻道」上載咗接近500條影片,主題包括閱讀、表演藝術、運動、園藝、綠化等,但總瀏覽次數大概得150萬,平均一段影片嘅觀看次數只有幾千次。署方透露成立頻道時已經使咗40萬港元,而一條影片嘅製作費就大約幾萬蚊,預計一年開支預算為2,000萬港元。不過呢筆錢都係由內部資源調撥。
在席議員嫌開支高,但觀看人次少,認為署方唔好浪費,建議可以提供影片畀中小學作教學用途,同時做更多推廣工作,例如賣廣告並同知名嘅KOL合作拍片以提高觀看率。
喺Facebook(Fb)上有超過22萬人追蹤嘅議員何君堯,平時都會定期喺Fb同YouTube上傳影片,對於點樣經營社交媒體亦好有心得。佢話YouTube有分紅機制,有KOL可以一個月獲得近6萬港元收入,建議署方將影片放上平台後加強宣傳,提高點擊率自然會有穩定回報,未來就唔使再「攤大手板」攞錢。佢又建議,應善用現有資源,例如同香港電台及政府新聞處協作,咁樣就可以減少成本開支喇!