政Whats噏：5000蚊消費券在囚人士點申請？　劉頴匡獄中有錢冇碇使

為刺激疲弱嘅經濟市道，政府早前喺財政預算案中提到，打算今年年中向每名18歲以上港人發放5,000港元電子消費券，不過還押或者在囚人士可以點申請呢？當局似乎未有詳細交代。去年參與民主派「35+」初選，涉嫌違反《港區國安法》，被控串謀顛覆國家政權罪嘅前民間集會團隊發言人劉頴匡目前仍被還押，其女友今日(14日)去完荔枝角收押所探佢，就話劉頴匡都好關心還押人士無得用智能手機，咁點樣申請5,000蚊消費券呢？

劉嘅女友話，雖然唔知點樣申請電子消費券，不過劉喺收押所貼信封，都賺咗幾百蚊，可以喺入面買物資，但劉又唔食煙，可以話係有錢都冇碇使，仲形容佢變相做咗富戶添啊。然而財多身子弱，鐵窗下無所事事嘅劉頴匡居然扭親條腰。劉嘅女友以為佢因為做運動而扭傷，但原來只係摺被嘅時候，一踎低起身，閃親條腰啫。