政Whats噏：辦事處前年遭破壞　何君堯收道歉信稱已原諒犯事青年

議員何君堯(Junius)位於荃灣嘅議員辦事處前年被大肆破壞，其中涉事青年朱沛恆原被判12個月感化令，但控方認為刑罰過輕再提出刑期覆核。Junius今朝(20日)喺Facebook發文話收到朱嘅道歉信，自己已經接受咗佢嘅道歉並原諒咗佢，仲話機會係畀真誠認錯嘅人。

朱沛恆上年8月被判12個月感化令，控方早前申請加刑獲批，原審裁判官改判200小時社會服務令，惟律政司仍認為刑罰過輕，向上訴庭提刑期覆核。朱月中去信Junius，喺信中表示誠心向對方道歉，又對於自己因幼稚及一時衝動，而破壞對方嘅辦事處感到內疚同後悔。佢話自己已經得到教訓，已重新投入社會同重新做人，希望Junius可以「大人有大量」原諒佢。

Junius亦喺信紙上寫上回覆，話原諒對方年少不經事，被人誤導而犯錯破壞佢辦事處，認為對方有深切悔悟對其有幫助，祝願佢可以重新振作。