政Whats噏：擔任港台電視部高層？　藝人馬浚偉重申無乜可能

年花10億港元公帑的香港電台(港台)屢被批節目立場偏頗，更多次被裁定違反廣播機構節目守則。最近管理層終於開始整頓港台，出現唔少節目同人手調動。之前有傳藝人馬浚偉將會接管港台電視部，佢承認早前曾經同高層商討喺電視部嘅合作，但就話「無乜可能」出任港台高層。

本月初有傳馬浚偉會接管港台電視部，仲話可能會拍攝社福節目，佢當時否認消息。而佢今日(20日)再回應時，話早前曾經同港台助理廣播處長周國豐商討喺電視部嘅合作，暫時未有具體定案。不過就話港台作為政府部門，必須由公務員擔任高層，自己亦有好多其他嘅工作，形容係「無乜可能」成為港台高層喇。

不過馬浚偉都真係「加入」咗港台喎，事關佢喺5月3日起會於港台第二台主持全新節目，主題有關社會基層、弱勢社群同青少年，仲會邀請唔同政治立場嘅演藝、政商等嘅嘉賓。之不過就唔會討論政治問題，亦唔會喺節目上激起矛盾或者令任何人唔開心，所以都唔擔心節目會被抽起咁話。