政Whats噏:王進洋自爆愛好大麻 區選時每日一支King Size

20210421
東網電視
更多新聞短片
王進洋尋晚深夜喺Facebook發貼文,自爆自己曾經係大麻吸食者。
尋日(20日)適逢國際大麻日,離島區議員王進洋深夜就喺Facebook發貼文,自爆自己曾經係大麻吸食者,話自己以往喺「420」呢一日,「都會roll(捲)一支大麻嚟食」,仲聲稱喺2019年反修例風波同區議會選舉期間,「壓力大X到一日一支king size(特大號)」。
王進洋話,自己平日食飯食得快,所以多咗個肚腩出嚟,加上每逢周未都會落街飲酒,飲得多之餘亦都會飲大咗,直至幾日前腸胃炎,認為要正視一下身體。之不過,雖然佢就話以後唔會再吸食大麻,但佢喺貼文中就強調自己認同「大麻唔係毒品」咁話喎。
根據香港法例第134章《危險藥物條例》第8條,除非根據並按照該條例或取得許可證外,任何人不得管有危險藥物,或吸食、吸服、服食或注射危險藥物,違者循公訴程序定罪後,最高可處罰款100萬港元同監禁7年;或循簡易程序定罪後,可處第6級罰款同監禁3年。
另外,立法會正審議《2021年公職(參選及任職)(雜項修訂)條例草案》,修例後現職區議員將被要求宣誓擁護《基本法》同效忠香港特區。王進洋早前對於係咪會宣誓態度反覆,由最早2月宣稱寧願辭職都唔宣誓,話會喺修例後、安排宣誓時自行辭職;到3月中開始轉口風後,話「比例係辭職佔六成、留低佔四成」,及後再宣布:「最後決定留低,宣誓」。