政Whats噏：各人相繼「割席」　否認加入袁彌昌學者平台　

舊年希望喺立法會選舉中爭一席位嘅策略研究專家袁彌昌，打算籌組學者平台回應時局。早前有風聲透露已經有8人加入平台，不過繼運輸及房屋局前局長張炳良發文否認後，再有人強調根本無意涉獵政治，甚至話同袁未必會再見面添！

袁彌昌最近積極籌組學者平台，話希望集合學術界嘅力量向制度同政策提出意見，仲透露成員已經碰頭見面。有傳教育大學副校長呂大樂以及香港大學經濟及工商管理學院經濟學教授鄧希煒已經加入平台。呂大樂雖則承認曾經同袁彌昌等人喺飯局閒談，但強調無意加入平台。

而鄧希煒同樣向傳媒表示，同一眾學者曾經飯敍見面一次，期間有人提出可以成立平台向政府提出政策倡議，只不過形容只係一條問題，十劃都未有一撇。佢更加直接話無意涉獵政治，同袁只係普通朋友，日後未必會再見面添啊！至於袁只係向傳媒表示「今次唔回應喇」，睇嚟佢真係出師不利，仲要接連被公開請食檸檬添啊。