因涉違反《港區國安法》嘅民主黨葵青區議員尹兆堅(肥尹)正被還押，早前因健康問題，獲醫院通知要入院做檢查。曾被判囚嘅社福界前議員邵家臻今(26日)話去咗探肥尹，透露對方唔單止擔心健康，更擔心區議員生涯好快結束，辭職後變成雙失中年。睇嚟肥尹依家都打定輸數準備辭職喎！

邵家臻喺Facebook上貼文，話今朝去探過肥尹，見面時第一時間就係關心佢嘅健康情況。佢提及肥尹確有擔心健康問題，但更擔心屋企生計喎，原因係覺得區議員生涯唔會好長，辭職後就會變成雙失中年，而佢開設收費平台Patreon，亦起步得遲，反應一般。

其實多位同樣因參與民主派初選涉違國安法，而被還押嘅區議員早前陸續請辭。就好似肥尹嘅黨友林卓廷上個月以無法親自履行職務為由，辭任北區區議員一職，但林就早喺年初就賣樓套現過千萬港元。之不過，肥尹唔單止呢單案在身，月初再因上年立法會環境事務委員會主席選舉一事被落案起訴，睇怕佢都要做定最壞打算喇！