政Whats噏﹕半億音樂噴泉一鑊泡 區議員揚言向申訴專員投訴

2021年04月28日 16:03
東網電視
更多新聞短片
觀塘海濱音樂噴泉啟用之後隨即事幹多多,民政署署長謝小華、同康文署署長劉明光今次有排煩!
造價高達半億、被坊間嘲為「小白象」嘅觀塘海濱音樂噴泉,上周四啟用之後隨即事幹多多,不但有地磚移位,日前更有人去到互動嬉水區用梘液沖涼,導致噴泉出現嘔泡奇觀。雖然康樂及文化事務署關閉設施進行善後,但今日(28日)就有市民前往康文署總部請願,促請署方加強巡視場地確保設施運作正常,亦有區議員揚言要向申訴專員公署投訴民政事務總署行政失當,亦會喺區議會大會上要求康文署交代維修費用等事宜。睇怕民政署署長謝小華、同康文署署長劉明光今次有排煩喇!
觀塘區議會主席蔡澤鴻批評音樂噴泉造價咁高,竟有地板鬆脫移位,實在無法接受,若果有市民因為地板不平而發生意外,一旦撼親頭就隨時命都冇呀!至於噴泉嘅嘔泡問題,蔡就話區議會都有向相關政府部門口頭查詢,但對方唔係話「了解緊」、就係話「調查緊」,至於點解噴泉嘔泡都可以整幾日,難免惹人質疑噴泉嘅循環系統太過垃圾。佢話坊間向有聲音指噴泉唔值咁貴,而區議會早前通過向民政事務總署投訴要求查閱合約細節,睇吓可否縮減噴泉規模,但政府一意孤行企硬要做,依家事實勝於雄辯,個音樂噴泉值唔值咁貴市民係有眼睇㗎!蔡又話本周內會代表區議會向申訴署投訴民政署行政失當,而下月開區議會大會嘅時候,亦會向康文署「追數」,要求交代維修費用同埋細節。
另一位觀塘區議員張培剛話,音樂噴泉開得幾日就要關閉,康文署難逃監管失職。雖則依家噴泉嘅保養期未過,但噴泉係康文署轄下嘅恒常項目,遲早署方都要自行負責維修費用,一定要全面檢查清楚噴泉冇事先可以收貨,唔好再出現「玩兩吓就地板移位、出泡就要維修等」嘅事情呀!
唔單止區議員狙擊康文署,今日亦有市民到康文署總部請願,要求署方加強巡視場地,亦要就音樂噴泉損壞一事嚴肅跟進,立案徹查係咪有人喺公眾地方行為不檢,或者刻意破壞音樂噴泉,並要求署方向涉事人追討所有維修費用添呀。