政Whats噏：張華峰預祝69歲生日　「大個仔」否決印花稅

立法會工作忙碌，不過一班議員都趁住今日(28日)立法會召開大會，為金融服務界議員張華峰(肥老闆)預祝生日。雖然好多人都知道肥老闆嚟緊5月2日就踏入69歲，但一有人問到佢今年幾多歲，喺旁邊嘅黨友林健鋒就搶答話28歲咋！

肥老闆嘅生日蛋糕上一向會寫上唔同款式嘅祝福語，好似舊年適逢疫情侵襲，蛋糕就寫上「健健康康」同「百毒不侵」。而今年都好貼合社會狀況，生日蛋糕寫住「乘峰破浪」同埋「否決印花稅」。問到佢有咩生日願望？佢就話希望立法會順風順水，政策順利執行，社會更和諧、穩定、繁榮咁話，而所屬政黨經民聯就可以為國家做多啲嘢喎。

而喺今日審議本年度財政預算案時，肥老闆就因為政府硬推上調股票印花稅而投下棄權票，肥老闆笑言，呢次係佢第一次反對政府議案。在場慶生嘅立法會主席梁君彥就話，你無反對呀，棄權咋嘛。另一名黨友石禮謙就話佢大個仔啦，為香港繁榮發展有自己意見咁話。