政Whats噏：田北辰開會整親條頸　要搶隔籬位個咪用

立法會會議室每個座位都有設立咪高峰，議員一人一個咪理應好公平呀。但係議員田北辰(田二少)竟然搶隔籬位個咪嚟用喎，乜咁霸道啊？

振興香港經濟事宜小組委員會今日(30日)開會，田二少發言嗰陣問主席可唔可以用另一邊嘅咪講嘢，話驚條頸扭親喎。問過田二少，佢忍唔住吐苦水，話會議室2A嘅設計令佢摸不着頭腦。皆因議員嘅咪設置喺左手邊，但係政府官員就坐喺右手邊，令佢好多時側埋個頭喺左邊，但又要望住官員發言喎，講到入肉咪搞到扭親條頸囉。佢話係上次坐會議室2A整親，一直都赤赤痛啊。

雖然係麻煩，但田二少打算日後每次都要求用右邊嘅咪發言，無謂再整親喇。不過佢話隔籬位有人坐就仲麻煩喇，下次開會可能要揀定個四周都無人嘅靚位啊！