政Whats噏：政府斥區議會失效　民主派區議員全被踢出防火委員會

17區區議會被泛民主派主導，早前被政府批評區議會已經失效，逼到政府忍唔住要出手整頓。泛民喺新一屆防火委員會冇得留低，但仍然死剩把口，質疑政府實行政治打壓。不過一班泛民區議員應該諗吓自己上任1年幾，喺區議會搞出幾多風雨先得㗎。 上屆地區防火會有13區、合共29名民主派區議員獲委任，不過喺尋日(30日)公布嘅新一屆名單已經再見唔到佢哋嘅身影。以油尖旺區為例，喺上屆區議會選舉中落敗嘅仇振輝、鍾港武、關秀玲、梁幸輝同潘景和成功獲委任。而身兼區議員嘅委員只係得番建制派嘅鍾澤暉可以留任，而泛民主派嘅林兆彬、朱慧芳同余德寶就係咁先喇。 而屯門區有指前區議員甘文鋒同樣喺名單內；西貢區前議員簡兆褀、溫悅昌同李家良亦被列入名單；深水埗區就踢走覃德誠，留低建制派嘅劉佩玉；至於大埔區嘅民選議員全數都係非建制派，佢哋都不獲續任防火會。就算林兆彬同余德寶獲政府頒發感謝狀都難逃一劫，余發文話睇到防火會重新洗牌，顯示民主派嘅空間進一步收窄，相信喺地區委員會已經完成歷史任務，而喺同日收到感謝狀真係得啖笑。而林早前更加去信民政事務專員表明希望留任，佢同樣表示自己同其他民主派被踢走，認為政府係希望「搞清一色」喎。 民政事務總署回覆東網時表示，防火會委員係嚟自社會各階層。根據現有機制，政府委任委員嘅原則係「用人唯才」，並會考慮多項因素，包括有關人士嘅才幹、經驗、誠信、可充分兼顧組織職能等，而從唔同途徑吸納有志服務社會嘅合適人士。 一班泛民區議員經常被批評以政治凌駕民生，對於政府政策盲目咁為反而反，影響地區運作同民生福利。眼見呢個局面，政府同區議會嘅關係愈趨惡劣，以致終於忍無可忍。其實政府早前已經唔再委任現屆區議員出任各區嘅分區委員會委員同埋地區管理委員會成員，仲有唔畀泛民區議員加入撲滅罪行委員會。面對泛民嘅不滿，當局就強調政府部門有充分渠道聆聽區議會聲音。其實邊怪得人㗎，自己一直搞搞震，依家人哋唔預你玩都係正常不過喇！