政Whats噏:西貢區議會通過動議 拒混凝土廠遷往將軍澳

2021年05月04日 22:31
東網電視
更多新聞短片
油塘混凝土廠引起空氣污染,觀塘區同西貢區都表明反對該廠安置在區內。
政府早前計劃將油塘東源街嘅混凝土廠搬去將軍澳第137區,但遭到將軍澳居民大力反對。西貢區議會今日(4日)就通過動議,話為保障將軍澳居民嘅健康同生活環境,要求發展局終止喺將軍澳重置油塘混凝土廠嘅研究,仲舉行聯署,至今已經有5,000名居民反對喇。
西貢區議員方國珊今日喺區議會提出動議,指區內唔少居民對重置混凝土廠嘅計劃感到震驚,質疑發展局罔顧居民健康,唔應該將混凝土廠搬去近年人口激增嘅將軍澳區。佢仲話將軍澳已經有建築廢料堆填區同埋填料庫,每日逾千部泥頭車經過將軍澳,如果加多個混凝土廠,將會加劇區內污染呀!
話說油塘東源街混凝土廠引起空氣污染等問題,因未能符合《空氣污染管制條例》被環保署拒絕其續牌申請。依家觀塘區同埋西貢區都唔想要呢間混凝土廠,唔知政府最後點處理呢?