政Whats噏：游蕙禎爆婚訊　暑假前與男友拉埋天窗

因捲入宣誓風波而被法庭裁定喪失立法會議員資格嘅游蕙禎，最新傳出同拍拖4年嘅男友林肇彥即將「拉埋天窗」！消息指，二人喺上月底已到婚姻登記處入紙註冊，之後會喺暑假前正式結婚。

一度被封為「傘兵女神」嘅游蕙禎，聽日(6日)生日後就踏入30歲大關。據了解，游、林二人早喺2017年相戀，戀情喺2018年被傳媒揭發下曝光。游蕙禎喺2016年11月宣誓風波期間，曾喺未經許可下闖入立法會會議廳，2018年5月被裁定非法集結罪成，翌月被判囚4星期。不過即使當時需要短暫分離，但二人仍然感情穩定。游舊年就曾經透露二人係一見鍾情，更形容林係佢嘅「靈魂伴侶」。

至於準新郎哥林肇彥，佢比游蕙禎細1歳，曾經就讀恒生管理學院嘅新聞及傳播系。林過往係本土派活躍份子，喺2016年曾經為梁天琦助選，曾經主持本土民主前線嘅網台，亦做過「星火同盟」嘅發言人。