政Whats噏：擾攘多時規管劏房水費獲通過　如何落實費思量

劏房業主濫收水電費問題嚴重，政府多年嚟都未有相應措施打擊有關行為，立法會今日(5日)就三讀通過議員麥美娟(Alice)早前提出嘅《2021年水務設施（水務設施規例）(修訂)條例草案》，規定任何人如以超過法例所定嘅用水收費，將有關供水轉售畀其他人，即屬犯罪。違反法例者經循簡易程序定罪，可被罰款1萬港元。儘管罸則具阻嚇性，不過立法只係第一步，有議員擔心點樣落實法例，若果難以執法，法例就算通過咗亦只會淪為「無牙老虎」啊！

有關法例喺今日三讀之前，有工會代表喺政府總部外請願，希望議會可以盡快通過修訂有關條例，保障基層租戶，杜絕無良業主濫收水費圖利。條例喺立法會三讀通過後，Alice即刻開心到請在場傳媒食布甸同雞翼，慶祝一下。佢話2017年已經想提出呢條草案，今次得到好多人幫手，先可以咁快將其交上立法會審議。不過草案通過後，政府需討論有關執行細節。發展局局長黃偉綸喺總結發言時，就話水務署會主動巡查，如有足夠證據一定會提出檢控。另外，署方亦會加強宣傳推廣，並喺網上發布資訊，鼓勵申請獨立水錶。

究竟水務署要點樣執法，至可以阻遏濫收劏房水費嘅現象呢？Alice建議水務署設立熱線電話，租戶可以打電話投訴或通知水務署執法。至於喺主動巡查方面，署方就可以問問租戶每月被收取多少水費，再回署檢查，就會知道租戶有否被濫收。

不過議員鄭泳舜就認為巡查有一定難度，又關注新例通過後，政府點樣落實執法，否則法例將會淪為「無牙老虎」。議員柯創盛則認為，局方要多方面研究點樣執法，包括署方如發現劏房租戶水錶有異常情況，就要打醒十二分精神加緊抽查，佢又建議加強喺社區推廣，令劏房租戶更了解自己係咪被濫收水費。

議員梁美芬就話劏房除咗濫收水費，安全問題亦惹人憂慮，佢主張增加房屋供應，縮短基層市民輪候公屋時間，屆時就毋須再為劏房水費呢啲小修小補嘅討論而花時間。建築、測量及都市規劃界議員謝偉銓亦都話立法規管水費只係治標不治本，指大幅增加土地及房屋供應，先至係改善劏房同基層住屋問題嘅上策。就此佢促請政府要戒除「議而不決，決而不行，行而不果」嘅官僚文化，尤其是土地及房屋相關發展計劃，擺脫慢及拖延嘅形象。