政Whats噏：勞工處將檢測寫成接種疫苗　想搵外傭打針填數？　

東網電視

政府要求外傭5月9日前進行檢測。

近日新冠肺炎變種病毒鬧得全城恐慌，政府之前要求37萬外傭喺5月9日前接受強制檢測。話說勞工處今日(6日)出稿，提醒外傭要盡快檢測，但竟然將已有13萬外傭預約喺5月5日至9日檢測，寫咗成「在檢測中心接種疫苗」。而今疫苗咁多副作用，接種率又未如預期，莫非個政府為咗「谷針」，無所不用其極？

勞工處喺今朝11點幾發稿，將檢測寫成打針，而且中英文版本都寫錯，英文亦寫成接種疫苗。該處事後約1個鐘終於知錯，嗱嗱聲出番個修訂版本，更正補鑊。其實政府近排成日反駁「谷針論」，話自己無「谷針」，今次自己出稿都寫錯檢測做打針，真係令人啼笑皆非，難免畀市民笑唔夠數，想搵埋外傭打針填數。

on.cc東網