政Whats噏:工務小組加會 財會取消會議 建制主導議會新常態?

2021年05月07日 21:09
東網電視
更多新聞短片
據立法會文件,財務委員會將取消本月28日嘅會議。
立法會舊年嘅亂象仍歷歷在目,當時民主派議員多次喺立法會財務委員會上「拉布」,搞到財會議程「大塞車」,雖然係咁加會,但上個立法年度都仲有十幾個議程未完成審議。民主派總辭後,立法會幾乎係建制派議員嘅天下,情況就完全唔同喇,政府見議會效率提高咗,提交不同項目以致工務小組委員會要加會審議,但另一邊廂,財會反而要取消會議,點解同一個議會,工務同財會竟有截然不同嘅現象呢?
據立法會文件,財會將取消本月28日嘅會議,而工務小組就諮詢議員意見,希望喺本月20日新增一節2小時嘅會議。點解財會要取消會議呢?莫非冇嘢要審議?財會主席陳健波(波哥)解釋,民主派離開議會後,一改往日民主派議員藉住積極發言,以阻礙議程順利通過嘅現象,加上議會少咗20幾個議員發言,議會嘅效率有所提升,財會審議項目嘅時間相對少咗,可以提早收工,不過就輪到工務小組嘅議程大排長龍,可能要工務小組主席謝偉銓(Tony)辛苦啲,快手煮多啲餸上財會呢個大廚房喇!
之不過,咁啱本月19日嘅禮拜三係佛誕假期,原訂於禮拜三舉行嘅工務小組就要開少一次會。睇返立法會網頁,工務仲有成11個項目有待處理。Tony就話工務小組嘅議程實在太多,希望議員都可以配合吓,假期翌日返嚟開會補數喎。
Tony話民主派離開議會之初,本身係方便政府同議會做嘢嘅,後來政府見議會效率提高咗,於是加快向立法會提交不同項目,所以預料工務小組今年都需要加會審議喇。被問到工務係咪審唔切,所以財會變相可以提早收工?Tony就話其實議員要求分開表決嘅時間少咗,加上各事務委員會同工務小組已就不同項目達成初步審議,理論上花喺財會上嘅時間就少咗喇。
之但係,工程項目本來就應該先由事務委員會同工務小組初步討論,再交由財會審批撥款。位處上游嘅工務小組所通過嘅項目多咗,但落到去下游嘅財會工作量竟然好似冇乜點提升,仲可以提早收工鬆人喎!雖則民主派已經離開議會,拉布情況不再,但建制派議員都應該金睛火眼、認真審議,若果被市民質疑把關不力就唔係咁好喇!