政Whats噏：周琬雯称因私人理由辞任区议员　宣誓前夕逾10人请辞

立法会下周三（12日）将恢复二读辩论《2021年公职(参选及任职)(杂项修订)条例草案》，修例后所有现任区议员均须宣誓拥护《基本法》及效忠香港特区，修例草案审议前夕，再多一名区议员宣布辞职。公民党（公文袋）深水埗区议员周琬雯，寻晚（7日）深夜喺Facebook发贴文，宣布自己“基于私人理由”，将于下月1日起辞任深水埗区议员一职。

周琬雯表示，自己喺本月7日向深水埗区议会主席杨彧递交辞职信，将于2021年6月1日起辞任深水埗区议员一职，形容有关决定系“基于私人理由”，但又谓“明就明”，希望一众街坊能够理解佢所做嘅决定。佢又向公文袋美孚团队其他三位致歉，又感谢佢哋嘅栽培同包容。

公文袋喺2019年区议会选举中，成功喺深水埗区嘅美孚北、美孚中同美孚南3个选区插旗，但随住身兼区议会副主席嘅美孚中选区区议员伍月兰喺旧年7月底退党，加上周琬雯宣布辞任区议员，公文袋喺美孚3区只系得番喺美孚北担任区议员嘅李俊晞。至于周所提及嘅美孚团队，仲包括葵青区荔华选区区议员张钧翘。

自政府喺2月底提出修例以嚟，至少有10名区议员已决定辞职，包括涉去年民主派“35+”初选案嘅谭凯邦、范国威、林卓廷同李嘉达等，以及表明拒绝宣誓而辞职嘅杜嘉伦、袁浩伦同黎铭泽。政界预计，当修例草案喺立法会通过后，短期内陆续会再有区议员辞职。