政Whats噏：巴士內唔戴口罩　區議員同乘客爆駡戰

為阻疫情傳播，政府要求使用公共交通工具嘅乘客需一直佩戴口罩。雖然措施落實近一年，但依然有人唔守規矩喎。今日(8日)網上流傳一段短片，當中可見巴士之內，懷疑係西貢區議員葉子祈，因為無戴口罩而同其他乘客發生爭論。

其實葉子祈喺公眾地方無戴口罩，早有前科。舊年9月，葉出席西貢區議會會議期間，就因脫下口罩而同其他與會人士爆發口角；今年2月葉亦都無戴口罩，走入商場向途人派利是封。至於今日段短片，巴士內疑似葉嘅男子雖遭其他乘客嘅聲討，但仍試圖將唔戴口罩合理化，喺巴士車廂內叫囂「你有無辦法證明我一定係傳播病菌？我有無周圍去噴口水，做出一啲違反公共衞生嘅行為呀？」又指其他乘客既然要報警處理，佢就留待他日上庭先至同法官交代。片中亦有乘客不齒咁話「佢唔係無口罩而係刻意玩嘢。」又有人怒斥「唔好阻住成車人！」

短片出街之後，葉嘅Facebook專頁好快就有人留言鬧爆，又要求葉要就事件公開交代。據悉，葉係於尋日(7日)下午搭乘路線796C巴士，期間佢感到口罩侷促於是摘下，引起其他乘客不滿，車長勸其戴返口罩但不果，惟有報警求助。