政Whats噏:食衞局公布措施多甩漏 學者促陳肇始問責下台

2021年05月08日 22:18
東網電視
更多新聞短片
食衞局尋日公布最新疫情措施竟然講到唔清唔楚,容易惹起誤會。
負責領導抗疫工作嘅食物及衞生局局長陳肇始,早前喺立法會回應新冠疫苗問題時,誤將「瑕疵」錯讀為「瑕辟」,全城引為笑談之後,估唔到連佢嘅下屬亦都開口夾著脷,講錯嘢。尋日(7日)食衞局公布最新嘅疫情措施,儘管依稿直讀照本宣科,但具體內容都可以講到唔清唔楚,容易惹起公眾誤會,就連食衞局常任秘書長(衞生)陳松青,亦都當眾講錯新措施嘅實施日期。有學者認為,陳肇始作為抗疫主官,實在難辭其咎。
話說陳松青喺記者會上講到,對應海外地區到港已接種疫苗人士,可以縮短強制檢疫期,曾逗留中國、澳門及台灣,又非循「回港易」返港,由原本需要接受14日家居強制檢疫,縮短至7日,另加7日自我監測,並於第12日接受檢測,指新措施將由本月14日開始。但後來當局出稿更正,正確實施日期應該係本月12日先至啱。
另外,衞生署衞生防護中心總監林文健,喺記者會上提及完成接種兩劑新冠疫苗滿14日嘅香港居民及入境人士,均可縮短檢疫期,其中不涉及變種病毒的密切接觸者,可免檢疫中心14日「疫監」,縮減至7日家居檢疫。當大家都以為當局放寬檢疫安排,殊不知呢個並非當局打算落實嘅新措施,而係根據衞生署衞生防護中心轄下科學委員會嘅建議咋!既然委員會嘅建議未被採納,向外界宣布又有咩用呢?
雖則記者會上,陳肇始個人並無失誤,不過檢疫安排及實施日期呢啲咁重要嘅資訊,食衞局都可以交代到甩皮甩骨、一塌糊塗,陳肇始作為食衞局之首兼政治問責官員,下屬犯錯,佢都有無可推卸嘅責任。理工大學專業及持續教育學院講師陳偉強都話覺得不可思議,佢提到陳肇始領導下嘅食衞局及相關部門,已經唔係第一次出錯,今次交代防疫資訊竟然咁多甩漏,可見到佢哋考慮不周,甚至係唔熟書,口快快講完之後,返去發現講錯,先至再作更正。至於陳肇始之前當眾大覺瞓,就簡直係公關災難,自毀形象之舉,市民會覺得點解要花咁多錢請呢位公僕咁話,陳肇始作為抗疫主官,實在難辭其咎,直斥做唔掂就真係換人算數喎。