政Whats噏：稱體力不佳辭任區議員　畢東尼入院做切除組織手術

早前以健康理由宣布辭任區議員職務同退出公民黨嘅觀塘區議員畢東尼，今日（10日）喺社交媒體表示，到聯合醫院進行微創切除組織手術。佢話呢個手術需時，並有一定風險，希望能夠平安完成手術，出院後盡快返到辦事處工作。

佢仲話街坊可以喺辦公時間內致電辦事處嘅電話，或者可以由聽日（11日）起，WhatsApp佢本人，佢喺麻醉藥效退之後，醒返就會盡量回覆街坊喎。

畢東尼上年去英國探親，隨後因變種新冠病毒爆發一度滯留當地，喺3月回港。佢指本來預定咗今年1月1日回港，並喺2月1日入院進行手術，唯一直未有相關安排，令進行手術嘅日子被迫推遲至5月中。佢又話返到香港之後感到身體大不如前，無論係體力定係精神上都比以往遜色不少，喺處理地區事務上亦感到吃力，意識到身體嘅狀況已經唔可以再應付議員嘅日常工作。加上預料手術後需要接受長期治療，所以畢喺上月宣布由今年6月1日起辭任觀塘區議員一職，並退出香港政壇。