政Whats噏:開會公然飲紅酒 泛民區議員被轟無規矩

2021年05月11日 17:03
東網電視
更多新聞短片
泛民區議員於區議會會議上公然飲紅酒,畀在場嘅建制派區議員批評無規無矩。
區議會角色同職能向以諮詢為主,雖然屬非政權性嘅區域組織,但一眾區議員畢竟都係支取公帑處理地區問題,開會時理應要尊重場合。深水埗區議會今朝(11日)開會時,就有幾個泛民主派區議員公然飲紅酒,畀在場嘅建制派區議員批評無規無矩、如開派對,質疑涉違反《區議會條例》同公職人員行為失當喎。
話說深水埗區議會今朝9點半開會,點知事隔15分鐘左右,該區區議員劉佩玉就見到因去年參與民主派「35+」初選、涉違反《港區國安法》及後獲准保釋嘅何啟明同劉偉聰、下月1日將離任嘅周琬雯同該區區議會副主席伍月蘭,喺會上飲紅酒。劉認為區議會會議乃嚴肅場合,與會嘅區議員飲紅酒,質疑佢哋有違《區議會條例》,要求該區區議會主席楊彧正視問題。
楊彧回應時只係話,見唔到《區議會條例》中有條文規定唔畀議員喺會上飲任何飲料,明言唔會禁止相關行為,相信議員會對自己行為負責喎。但縱使無明文限制,飲酒都要視乎場合。到底開會期間飲酒是否恰當,公眾自有判斷。