政Whats噏：政府電動車數字同審計署有出入　議員：唔知信邊個

以電動車取代燃油私家車，已成環保趨勢，而政府早前就宣布，計劃2035年以前停止登記燃油私家車。然而今日(12日)立法會大會上，有議員批評政府未有對使用電動車起牽頭作用，又質疑電動車充電設施不足。環境局局長黃錦星就搬出一堆數字，指目前全港電動車佔總體車輛3%，而每8架政府房車就有1架係電動車。當佢誇耀政府使用電動車較全港高幾倍嘅同時，就遭到議員鬧爆政府選擇性使用數字，指黃錦星提供嘅數字同審計署有出入喎。

黃錦星話政府一直鼓勵部門以電動車取代燃油車，高級官員都會優先使用電動車，亦都會考慮將垃圾車、洗街車轉為電動車，又指政府物業設有充電器嘅泊車位唔會少於3成，新落成嘅政府建築物內嘅泊車位亦會提供充電器。對於政府先前推出嘅20億元，以協助現有私人住宅樓宇停車場安裝電動車充電基礎設施嘅「EV屋苑充電易資助計劃」，至今已收到370份申請，涉及8.8萬個私人泊車位，反映本港電動車使用量不斷上升。

議員田北辰(田二少)就指黃錦星提供嘅數字同審計署有出入，話「唔知信邊個」，又估計2030年全港大概有80萬至100萬架私家車，質疑到時政府提供嘅停車場充電位根本唔夠，認為比例唔合理。議員石禮謙同樣話黃錦星提供嘅數字同審計署報告有出入，又批評政府選擇性使用數字，敦促政府官員到立法會一定要真誠回答，並要求黃錦星交代政府宿舍到底有冇電動車充電設施。面對議員嘅質疑，黃錦星未有正面回應，只係話未來嘅電動車充電時間將會加快，會適當畀更多私家車邁向電動化，又話政府會對舊有嘅政府宿舍進行研究咁話喎。

其實田二少都唔係第一次鬧爆政府政策啦，開完會之後佢意猶未盡，透過社交平台繼續轟炸，斥政府每次都只係重複答案、遊花園，狠批政府先前發布嘅《香港電動車普及化路線圖》冇內容，反問政府仲講乜嘢推動電動車嘅目標呢？