政Whats噏：北環線竣工無期　議員嘲兒孫出世都未有得搭

政府早喺《鐵路發展策略2014》提出興建北環線，以配合新界東北發展，但到依家仍然未搞掂。有議員今日(13日)喺立法會大會上，鬧爆北環線從發展規劃到依家足足30年，政府發展速度完全追唔上，要求政府解決發展「龜速」嘅問題，掃除所有過時嘅概念。

立法會審議「以口岸經濟帶動新界北發展」議員議案期間，議員麥美娟(Alice)話北環線規劃發展30年，依家都未有，仲愈講愈激動，話議員陸頌雄個仔依家十幾歲，到陸嘅孫出世，都未必搭到北環線！佢批評香港發展「龜速」，要求政府帶頭檢視所有條例，保證工程嘅速度。

唔單止咁呀，Alice仲話政府早前喺立法會發展事務委員會申請10億港元撥款，用嚟研究新界北發展。佢話完全接受唔到呢個做法，仲話政府言下之意即係7年期間，「新界北連草都種唔到條」，呻話新界北發展乜嘢都係假，速度先係最緊要呀！