政Whats噏:倡制裁名單 許智峯籲公僕篤灰 被嘲蠢人先會信

20210514
東網電視
更多新聞短片
被警方通緝嘅許智峯,目前正與家人流亡澳洲。
正被警方通緝、目前流亡澳洲嘅前民主黨(白鴿黨)立法會議員許智峯(峯鴿),今日(14日)就喺Facebook(fb)發貼文,揚言正研究制訂「該被制裁的香港官員名單」,針對高級公務員同其他公職人士,仲呼籲現職公務員「出賣同事」添。有時事評論員分析,峯鴿出貼文用意在於討好美國,但就形容峯鴿過去謊話連篇,只有蠢嘅公務員先會信佢講嘢!
自《港區國安法》喺舊年6月30日深夜在港實施後,美國先後多輪制裁多名中港官員作回應,涉及本港特首、多名司局長同警方高層。峯鴿今日喺fb發貼文,提到「國際戰線」嘅其中一個工作重點,就係呼籲國際制裁「打壓香港民主、自由、法治的官員」,形容香港仲有好多高官或者高級公務員,「同樣助糾為虐、欣然為暴政服務」喎。
峯鴿仲舉例話有好多政府部門中人都值得被制裁,例如教育局就有份將「黃」老師釘牌;而政制及內地事務局同民政事務局,就分別有份推動有關區議員宣誓嘅修例工作,同埋作為執行嘅部門。佢又指監警會主席同成員縱容警暴,而大學管治架構成員就有份打壓學生等等,話佢哋都值得列入「制裁名單」當中。
峯鴿仲特別呼籲喺政府體系內各部門工作嘅人「篤灰」,向佢提供其他同事嘅姓名、職級同所屬部門等資料,等佢整理同核實後就會加入名單,叫國際社會考慮制裁。佢甚至喺貼文入面加入Hashtag,話「#請廣傳於公務員群組」添!
時事評論員陳雲生形容峯鴿做法極度卑鄙、無恥,目的只係為討美國人歡心,喺美國政府面前立功,形容「助糾為虐、欣然為暴政服務」嘅人應該係峯鴿先啱。佢又批評,峯鴿自已逃避在港嘅法律責任後,喺外國說三道四,做法完全唔要得!
不過,陳坦言以峯鴿過去假借謊言離港、實質棄保潛逃嘅經歷,令佢難以取信於人,形容只有蠢嘅公務員先會信佢嘅說話,認為貼文喺公務員團隊之中所起作用不大。陳又認為香港政府應該硬起來,唔應該維持被動,反而應主動制裁協助黑暴嘅外國官員,以及當日協助峯鴿潛逃嘅兩名丹麥國會議員等。