政Whats噏：宣揚守護動物訊息　蕭澤頤同警犬拍檔做平板支撐

近排社會上有唔少虐待動物嘅案件發生，警務處為咗鼓勵更多市民支持同協助打擊殘酷對待動物嘅行為、宣揚「守護動物、尊重生命」嘅訊息，警隊現正推展「動物守護•社區大使」計劃，喺社區層面從教育、宣傳、調查同埋情報搜集4個方向，凝聚愛護動物人士嘅力量，該計劃亦正舉行「我撐動物挑戰賽」，連副處長（行動）蕭澤頤都「瞓晒身」，究竟個活動要做咩㗎呢?

話說呢個挑戰賽，係要宣揚人同動物互相支持嘅訊息，喺5月初開始，參加者可以同寵物拍檔，進行「人寵合一」嘅平板支撐動作，而蕭Sir日前都身體力行，同警犬隊成員一齊拍攝挑戰賽嘅示範短片，又同警犬展示各種互動方法，短片入面除咗有巡邏犬，仲有守護之星Sunny周埋Zander一齊參與添。

參與挑戰賽嘅方法好簡單，淨係需要同寵物維持15秒或以上嘅平板支撐動作，將過程拍低，跟住將短片upload上Facebook或者Instagram，內文hashtag返「#我撐動物」，再邀請你3位朋友一齊玩就得㗎喇。