政Whats噏：張炳良批評政治結構落後　問責局需大改組

運輸及房屋局屢被批評涵括範圍太廣，政策未能到位，就連前高官都忍唔住批評香港政治結構落後。運房局前局長張炳良接受電視訪問時透露，當年加入政府時獲邀負責房屋及土地規劃政策，可惜最終「拆局」失敗而改變範疇。佢話有時世界、環境變咗，就自然會有啲新嘅政策範疇需要人處理。佢批評香港政治結構落後，認為問責局需要大改組，而過程中立法會唔應該過分介入。

點解立法會唔應該過分介入？張炳良解釋，立法會只係負責審議撥款，本身就唔應該介入太多行政上嘅改組，但往往因為行政改組牽涉要修改法例，而如果議會喺修例上一再拖延，就會令改組變得好艱難喇！最後令到行政長官覺得費事煩，盡量唔改好過改，而呢個情況係無論邊個擔任行政長官都會出現嘅。

上屆政府曾經提出「五司十四局」架構重組方案，唔單止加入兩名副司長，部分政策局亦會重組，包括運輸及房屋局同發展局重組職能，土地及房屋政策將交由一個政策局掌管，但最終因為民主派喺立法會拉布而拉倒。

實際上，現任運輸及房屋局局長陳帆都喺2018年時講過，話政府會考慮改組運房局，如果成功「拆局」，佢可以有更多時間同能量，集中處理房屋相關政策，但其後政府回應議員質詢時就改口話，政府現時需要全力抗疫，重振經濟，又話改組涉及修例等等，所以至今都未有時間表喎。

唔單止運房局，其實有唔少議員都曾點名鬧食物及衞生局孭咁多嘢上身，但實際上根本兼顧唔到，搞得醫療，又搞唔掂街道衞生，促請政府「拆局」，將「食物」同「衞生」分返開，方便管理咁話。有議員舉例醫療、街道衞生，甚至連漁農嘅範疇都係由食衞局負責，但疫情未完全退去，食衞局需要專注處理新冠肺炎，但都冇理由唔理衞生問題。其實東網之前接連踢爆多個街市養「鼠」為患，睇嚟食衞局仲係好多問題需要跟進。

本屆政府任期餘下只有一年多，過去本港社會經歷2019年反對修訂《逃犯條例》示威動盪，上年新冠肺炎來襲，到依家疫情仲係反覆，各行各業備受衝擊，經濟下行，失業率屢創新高。政府一直被批抗疫不力，就連前年反修例示威嘅案件審訊亦大量積壓，政府內部立立亂，睇怕政府唔會喺短時間內搞運房拆局喇！