政Whats噏：陳沛然身穿病人服坐輪椅　網友話畀佢嚇親

話時話，醫學界議員陳沛然(Pierre)自言係足球員，興趣係做醫生，竟然仲有時間秘撈添呀！

Pierre近日喺社交平台上載咗張相，着住醫院病人衫，坐喺輪椅，見佢戴咗口罩，垂低頭，膝上放咗個文件夾，唔通中招？但佢就貼文話「今天我是演員，無飯盒。」謎底揭穿嘞！

唔係中招，係演戲啫！但佢嗰一頭亂髮就嚇親網友，唔少網友留言話好驚，知道真相後，就話「好彩你話演員咋， 比 (畀)你張相嚇親。」另有網友就話「好有……長期病患feel喎陳醫生！ 」唔少網友都讚佢演技好，入戲，有網友仲話「唔拍戲真係浪費咗陳醫生嘅演技」。睇嚟佢可以殺入娛樂圈。

睇嚟Pierre呢身病人Look都係因為教書，客串扮病人，事關喺舊年10月，佢都扮過病人，仲喺貼文中寫住：「不用擔心，今日去教書，兼職做演員」，所以依家都算係重操故業，下次介紹佢，要加埋兼職演員。