政Whats噏:鄭松泰死撐荒唐言論 議員轟死不悔改

2021年05月18日 18:02
東網電視
更多新聞短片
鄭松泰尋晚再死撐自己喺會上嘅言論,被轟死不悔改!
《東方日報》(下稱東方)尋日(17日)發揮第四權,頭版報道律政司司長鄭若驊丈夫潘樂陶任主席嘅安樂工程,所承包嘅運輸署2億港元工程問題多多。之不過,議員鄭松泰同日喺立法會討論將「起底」行為刑事化嘅相關修例時,竟然舉起東方頭版,質疑有關報道喺修例後屬起底,當場被多名議員圍插。之不過,鄭松泰晚上仲喺Facebook(fb)發貼文,質疑「媒體第四權」係搞笑,再惹嚟議員炮轟佢死不悔改!
政府早前建議修訂《個人資料(私隱)條例》,將「起底」行為刑事化,政制事務委員會尋日開會討論有關事項,期間鄭松泰嘅發言就被一眾議員狠批「亂噏」同不負責任。之但係,鄭尋晚就繼續喺fb發貼文,唔單止引述東方報道其會上發言,並且加入自己嘅評論:「搞笑位有兩個:一、媒體第四權;二、鄭若驊作為公職人員。」
議員麥美娟(Alice)今日(18日)就強調傳媒進行偵查式報道同「惡意起底」,兩者不可混為一談,指傳媒係基於新聞人物嘅行為進行報道,並非係要威嚇或者傷害有關人士;反觀今次建議修例規管嘅「起底」則屬於惡意行為。Alice就形容鄭松泰作為堂堂一個博士,點會唔識分辨兩者嘅區別!
之不過,Alice就話鄭松泰明知自己喺議會上講錯嘢,仲要再發貼文死撐,唔單止係自討沒趣,仲係死不悔改。佢又估計鄭之所以咁做,係因為立法會目前只剩佢一個民主派,所以要做啲嘢向「手足」交代,但就希望佢下次做事可以高明啲。
另一議員何俊賢(高佬賢)就重申,鄭若驊作為律政司司長,佢嘅家人就政府工程合約嘅投標,過程有冇出現問題係關乎公眾利益。佢又話,東方嘅報道內容並無超越必要範圍,亦都冇濫用新聞自由。
高佬賢又話今次事件令市民可以睇到議員質素係點,對市民嚟講都係好事;又形容身為議員竟然做出呢啲行為,社會應該要反思點解當日會選到佢入立法會喎。