政Whats噏：擔心宣誓無效失議席　梁里退黨擬辭任區議員

立法會早前通過嘅《2021年公職（參選及任職）（雜項修訂）條例草案》已經刊憲生效，預計下個月將安排區議員宣誓。政界消息指，西貢區議員梁里將辭任區議員，同時已經搵到新工作。梁並無正面回應，但承認自己已經喺上個月退出政黨新民主同盟。

政界消息指，梁里最近向身邊人透露由於擔心會被判定宣誓無效而喪失議席，所以準備遞辭職信，自己亦已經準備後路，搵到第二份工。東網記者向梁里求證，佢對於辭職傳聞表示唔回應。另一方面，佢承認已經喺上個月退出新同盟，但同樣並無透露太多，只係話基於私人理由喎。

至於新同盟輪任召集人任啟邦早前就表示，如果有成員完成宣誓後被取消區議員資格，會考慮係咪需要解散、或者轉用另一個「招牌」籌組其他組織。之不過，諗呢個問題係咪太長遠啊，唔知其餘成員會唔會趕喺宣誓前陸續退黨呢？